ഓന്ത്...

ഇടതു കയ്യിലെ
ചൂണ്ടാണി വിരലിന്റെ
ഉന്നത്തിലും
ഇടം കണ്ണിന്റെ
അർജ്ജുന ലക്ഷ്യത്തിലും
നിൽക്കുമ്പോൾ
പച്ച നിറമായിരുന്നു,ഒന്തിന്.
ഓങ്ങിപ്പിടിച്ച
കരിങ്കൽച്ചീള്
പതിക്കും മുമ്പ്
ഒരു നിറം മാറ്റം,
മനസ്സിന്റെ കറുത്ത തൊലിപ്പുറത്ത്
ചാടിയിരുന്ന്
ഓന്ത് അണപ്പകറ്റുമ്പോൾ
ലക്‌ഷ്യം തെറ്റി കല്ല്‌
എങ്ങോ പതിച്ചു.
ഓന്തിന്റെ ചോരക്കണ്ണിൽ നിന്ന്
ചെമപ്പു പടർന്ന്
ഹൃദയത്തിൽ
ഒരു റോസാപ്പൂ വിരിഞ്ഞെന്നും
അങ്ങനെ പ്രണയം തുടങ്ങിയെന്നും
ക്രമേണ, പ്രണയം
രൂപവും നിറവും മാറി
ഒന്തായിപ്പോയെന്നും
നാടോടിക്കഥ.